Elding hefur aldrei grandað farþegaþotu - flugmaður sá logandi eld

Elding hefur aldrei grandað farþegaþotu. Um það eru franskir flugöryggisfræðingar sammála. Þeir eru hins vegar ráðþrota gagnvart hvarfi þotu Air France yfir Atlantshafi á leið frá Rio de Janeiro til Parísar. Í gegnum veðrakerfið við miðbaug fóru 30 aðrar þotur klakklaust á svipuðum tíma og súa franska.

Þar á meðal var þota frá brasilíska flugfélaginu TAM og flugstjóri hennar sagðist hafa séð eitthvað brennandi á sjávarfletinum. Tímasetning hans kemur heim og saman við hvarf Air France-þotunnar. Flugmaðurinn vissi hins vegar ekkert um afdrif hennar fyrr en eftir lendingu í Brasilíu og lét þá vita  af sýn sinni.

Flugöryggisfræðingar vilja ekkert útiloka sem hugsanlega ástæðu slyssins, ekki heldur hryðjuverk. Þeir eru efins um að elding eða illt veður hafi orsakað slysið, segja þotur smíðaðar til að standast hvort tveggja og oft fá í sig eldingar. 

Þeir telja helst að samverkandi þættir hafi átt sér stað, þ. á m. alvarleg tæknibilun og hugsanlega veður. Þeir eru á því að eyðilegging þotunnar hafi gerst snögglega og gengið hratt fyrir sig. Það ráða þeir m.a. af því að flugmennirnir hafi ekki sent út neyðarkall. Slíkt kalla hefðu aðrar þotur átt að heyra en franska þotan var utan ratsjár- og fjarskiptasambands við Brasilíu og Afríku þegar hún hvarf.

Franska stjórnin fór strax í gær fram á aðstoð bandaríska varnarmálaráðuneytisins við að staðsetja slysstaðinn. Vonast er til að með hjálp njósnahnatta megi staðsetja sem nákvæmast hvar hún kom niður til að auðvelda leit að braki og hugsanlega hljóð- og ferðritum hennar.

Vafasamt finnst mér að leggja trúnað á frétt norska götublaðsins Verdens Gang um að farþegi í þotunni hafi sent sms til sinna nánustu er þotan var að farast. Hvernig er hægt að senda sms úr flugvél sem er utan alls venjulegs fjarskiptasambands?

 

Athugasemdir

[F (IP-tala skráð) 2.6.2009 kl. 07:38]

Flestar nýjar og nýlegar farþegaþotur hafa síma í hverju einasta sæti og  þessvegna auðvelt að senda sms og einnig e-mail úr "entertainment" kerfi vélanna.   Svo þetta er alveg jafn sennilegt og hvað annað....

[Ágúst Ásgeirsson, 2.6.2009 kl. 12:28]

Ekki andmæli ég þessu fróðlega innleggi. Þó ferðast ég talsvert með Air France, þegar tvisvar á þessu ári, og hef aldrei séð síma hjá þeim. Vera má að svona skemmtistöðvar séu í þotum sem fljúga á leiðum til annarra álfa. Man eftir einhvers konar símum í SAS-þotum fyrir nokkrum árum en þeir virkuðu aldrei! Allavega ekki þegar ég reyndi.

[Ágúst Ásgeirsson, 2.6.2009 kl. 12:42]

Við þetta má bæta, að þotan var tekin í notkun ný í apríl 2005. Átti að baki 2.500 flugtök og lendingar og  18.870 flugstundir. Við skoðun í apríl sl. reyndist allur búnaður í henni í stakasta lagi. Flugstjórinn var með 11.000 tíma reynslu, þar af 1.700 á Airbus A330/A340. Aðstoðarflugmennirnir tveir voru með 3.000 og 6.600 stundir að baki.  

[Bjarki (IP-tala skráð) 2.6.2009 kl. 15:24]

Eldingar hafa átt þátt í flugslysum, sjá t.d. http://en.wikipedia.org/wiki/Pan_Am_Flight_214 En það eru mörg ár síðan þetta var og gengur ekki upp að nýleg vél skaðist af eldingum einum saman.

SMS-sagan er bara flökkusaga sem komst af stað fyrir misskilning blaðamanns í Brasilíu, mögulega vegna frétta af því að tölvukerfi vélarinnar hefðu send sjálfvirk bilanaboð til stjórnstöðva flugfélagsins. Það er svosem tæknilegur möguleiki að koma SMS skilaboði frá flugvél yfir Atlantshafi eftir ýmsum leiðum ef kerfi til þess  eru um borð en í þessu tilviki er ekkert sem staðfestir slíkar frásagnir. Það hefði líka verið ólíkt gagnlegra ef eitthvað hefði heyrst frá flugmönnunum sem þögðu á meðan farþegarnir eiga að hafa verið að smessast á við ástvini. Þetta er hið dularfyllsta mál.

[Finnur Bárðarson, 2.6.2009 kl. 16:16]

Maður hefur stundum verið að fylgjast með þáttum á National Geografic þar sem aðdragandi flugslysa eru rakin, og það virðast alltaf vera óteljandi samofnir þættir, frá smá bilunum til flugstjóra sem ekki bregðast rétt við af einhverjum ástæðum. Þetta er skuggalegt

[Stefán Atli (IP-tala skráð) 2.6.2009 kl. 20:44]

http://www.vf.is/resources/images/Frettir/eldingarnef.jpg

Sjálfur er ég einkaflugmaður og veit vel að líkurnar á að elding geti grandað flugvél eru sáralitlar en eins og myndin í slóðinni sem ég sendi hér með sanna það að elding getur valdið nægu tjóni til að granda vél - Ekki miklar líkur en alls ekki útilokað..

Sjálfur tel ég mesta líkur á samblöndu mistaka flugmanna (viðbragðarleysi eða rangar ákvarðanartökur) ásamt veðri hafi valdið slíku ástandi að þetta slys hlaust að ..

En já, skuggalegt mál ..

[Vilhjálmur Eyþórsson, 2.6.2009 kl. 22:26]

Það virðist alls ekki óhugsandi að vélin hafi flogið inn í þrumuský. Uppstreymi þar getur verið óskaplegt, mörg G, þannig að vængur eða vængir vélarinnar hafi bókstaflega rifnað af. Þessar vélar virðast ekki sérlega sterkbyggðar, en fyrir nokkrum árum brotnaði stélið af Airbus vél yfir New York, svo hún hrapaði.

[Árni Stefán Árnason (IP-tala skráð) 3.6.2009 kl. 00:56]

Hafði samband við Einar Sveinbjörnsson veðurfræðing sem tjáði mér að veðrahvörf á þessum slóðum næðu upp í 15-17 km hæð. Þannig hefur þessi airbus getað lent í ofsaveðri í þessari hæð...sem vekur upp þá spurningu hvort vélin hafi þolað það álag.