Franskur sigur í Tour de France

Vart gat það betra verið í Frakklandsreiðinni [Tour de France] í dag. Franskur sigur á fimmta degi, hinn fyrsti í ár, en vonandi verða þeir fleiri. Einn litríkasti hjólreiðamaður Frakklands undanfarin ár, Thomas Voeckler, hjólaði fyrstur yfir marklinuna eftir 196 km kappreið.

Voeckler sleit sig frá megin hópnum ásamt fimm öðrum eftir um 15 kílómetra. Og svo spretti hann frá keppinautum sínum er tæpir 5 km voru í mark. Megin hópurinn dró á hann á síðustu kílómetrunum en ekki nóg; Voeckler var sjö sekúndum á undan Rússanum Ignatiev og Bretanum Cavendish.

Þetta er í fyrsta sinn sem Voeckler vinnur dagleið í Frakklandsreiðinni. Og það bar ekki aðeins upp á afmælisdag liðsstjóra hans, Jean-René Bernaudeau, yfirmanns Bbox Bouygues Telecom. Heldur eru  einnig í dag nákvæmlega fimm ár frá því Voeckler hrifsaði til sín gulu treyjuna sem forystusauðurinn í keppninni skrýðist. Henni klæddist hann í nokkra daga í Túrnum 2004, eða þar til Lance nokkur Armstrong tók við henni í Ölpunum.

Þeir Voeckler og Armstrong eiga það sameiginlegt,  að báðir viðbeinsbrotnuðu með nokkurra daga millibili í mars sl.

Um Frakklandsreiðina er það annars að segja, að Svisslendingurinn Fabian Cancellara hefur enn forystu í keppninni og hefur skrýðst gulu treyjunni frá fyrsta degi. Armstrong er í öðru sæti, sekúndubrotum á eftir og þriðji er liðsfélagi Armstrong, Spánverjinn Alberto Contador, sem talinn er líklegur til að vinna keppnina í ár.

 

Athugasemdir

[Steinn J. (IP-tala skráð) 10.7.2009 kl. 08:37]

Keppnin er ótrúlega spennandi og lygilegt hvað Armstrong er að standa sig vel. Það má þó ekki gleyma því að hann er í sterkasta liðinu og þar vinna menn vel saman. Annars munu fjöllin næstu daga sennilega skera úr um hverjir verða í efstu sætunum. Annars er ótrúlega gaman að fylgjast með keppninni og öllum umstanginu í kringum hana. Svo er ekki síður gaman að horfa á tímatökurnar og sjá þessu flottu háþróuðu hjól sem þeir nota.

[Ágúst Ásgeirsson, 10.7.2009 kl. 16:43]

Sammála þessu, mikið drama og Lance Armstrong nýtur reynslunnar vel. T.d. á öðrum degi þegar hann fór með Columbialiðinu sem reif sig frá hópnum og setti á mikla ferð. Alberto Contador var þá aftarlega í kássunni og missti af fremsta hópnum og féll aftur fyrir Armstrong að tíma. Í gær stráféllu menn hvað eftir annað í bleytunni á leið til Barcelona, þar á meðal Tom Boonen. Og ekki leitt að sjá Thor Hushovd spretta til glæsilegs sigurs þá. Byrjunardagarnir hafa ekki verið svo tíðindamiklir árum saman. Sé fram á mikla skemmtun næstu dagana.

Ég vona auðvitað að frönsku hjólreiðamennirnir eigi eftir að gera meira.