Eiffelturninn mest myndaða kennileiti heims

Vísindamenn rannsaka allt mögulegt og ómögulegt og nú hafa þeir komist að því, að ekkert kennileiti í heiminum sé ljósmyndað jafn mikið og Eiffelturninn í París. Upp í turninn fara 7 millljónir manna árlega sem er þó ekki nema tæp 10% erlendra ferðamanna sem til Frakklands koma á ári.

Fyrir nákvæmlega hálfri þriðju klukkustund voru 120 ár frá því Eiffelturninn var tilbúinn og opnaður almenningi. Það gerðist 15. maí árið 1889 klukkan 11:50 fyrir hádegi að staðartíma í París. Víst er að allar götur síðan hefur turninn verið myndaður mjög. Einnig hefur hann verið viðfangsefni teiknara og listmálara. 

Rannsóknin sem í upphafi er vísað til fór fram í Cornell-háskólanum í Bandaríkjunum og tók hálft ár. Hún byggðist á úrvinnslu á 35 milljónum ljósmynda sem 300.000 notendur myndvefjarins flickr birtu  á vefnum. Við rannsóknina beittu þeir svonefndri „ofurtölvu“.

Trafalgartorgið í London er næst vinsælasta myndefnið og í þriðja sæti Tate-nútímalistasafn borgarinnar. London kemur vel frá rannsókninni því tvö önnur kennileiti, Big Ben og Lundúnaaugað', eru í fjórða og sjötta sæti yfir mest mynduðu kennileiti heims. Frúarkirkjan í París (Notre Dame) er í fimmta sæti og Empire State-byggingin í New York í því sjöunda.

Athugasemdir

[Páll A. Þorgeirsson (IP-tala skráð) 17.5.2009 kl. 17:18]

Já, ég er víst búinn að taka nokkrar myndirnar í Frakklandi og þó nokkrar í og við Eiffelturninn.  Í einni ferð minni tók ég yfir 500 myndir í París og nágrenni.  Ekki undrar mig þó Eiffelturninn sé mikið myndaður, hann er ekki bara tæknilega stórkostlegur, hann er stórbrotið "listaverk" í mínum augum. Þau eru nú reyndar mörg listaverkin í Frakklandi.

[Ágúst Ásgeirsson, 17.5.2009 kl. 19:52]

Sammála þér, Páll, varðandi turninn. Hugsa sér hvernig hægt var að ná þeirri nákvæmni við bygginguna, svo stöplarnir myndu t.d. hallast nákvæmlega í byrjun svo þeir myndu mætast rétt er ofar dró.  Já, og París er listaverk útaf fyrir sig.