Hraður samdráttur í neyslu borðvíns í Frakklandi

Að meðaltali drekkur hver Frakki eitt glas af borðvíni á dag, að sögn landbúnaðarráðuneytisins í París. Fyrir 50 árum var neyslan þrjú glös að meðaltali. Því þykir samdrátturinn ógnar hraður og ógnvekjandi, í þessu rótgróna vínframleiðslulandi.

Til að setja þetta í annað samhengi drakk meðaltals Frakkinn 120 lítra af borðvíni á ári fyrir hálfri öld en í dag 43 lítra. Milli áranna 2007 og 2008 minnkaði neyslan um 4 lítra á mann. Meðal skýringa á samdrættinum er mikill áróður um óhollustu óhóflegrar drykkju og strangari ákvæði um áfengismagn í blóði undir bílstýri.

Hér þykir um áhyggjuefni að ræða fyrir vínbændur og ekki er útlitið gott á krepputímum. Þannig benda tölur til þess að neyslan innanlands á fyrsta fjórðungi ársins sé 15% minni að magni en á sama tíma í fyrra og 28% verðminni.

Samkvæmt talnafræði hagstofu landbúnaðarráðuneytisins neyta 35 ára og yngri þrisvar sinnum minna víns en meðal-Frakkinn. Hins vegar drekka 50-64 ára tvöfalt meira en hann.  

Árið 2008 kostaði flaska af rauðvíni að meðaltali 3,54 evrur út úr búð. Tveir þriðju vínsölunnar innanlands í Frakklandi fer fram í stórmörkuðum.  Nam sala þeirra á borðvínum í fyrra 3,32 milljörðum evra.

Það er ekki einungis neyslan sem dregist hefur saman, heldur framleiðslan einnig. Þannig telst landbúnaðarráðuneytinu í París til, að uppskeran hafi numið 42 milljónum hektólítra í fyrra. Var það minnsta framleiðsla í 15 ár.

 

Athugasemdir

[Gunnar Þórðarson (IP-tala skráð) 27.5.2009 kl. 12:18]

Þetta eru fróðlegar upplýsingar og spurning hver þróunin er heima á Íslandi.  Ég er sjálfur 54 ára og finnst gott að fá mér rauðvínsglas.  Hinsvegar tek ég eftir því að yngri kynslóðin, börnin mín sem fædd eru 1980, 84 og 88, er mun minna fyrir áfengi en ég og mínir vinir.  Rauðvínsdrykkja hefur aukist verulega heima við mína kynslóð en ég er sannfærður að nú dregur úr því, og þróunin verði þá svipuð og þú lýsir í pistli þínum frá Frakklandi.

Sjálfur bý ég í Úganda um þessar mundir og mér sýnist það vera aðallega útlendingar sem drekka rauðvín.  Heimamenn eru meira fyrir bjór.  Enda er hér minni menning að borða sér til ánægju heldur en á vesturlöndum.