Boeing hefur enga flugvél selt á Parísarsýningunni

Paísarflugsýningin hófst í gær en hún fer fram annað hvert ár. Nú í skugga alþjóðlegrar efnahagskreppu og lánsfjárskorts og alvarlegra flugslysa. Athygli vakti, að bandaríski flugvélaframleiðandinn Boeing seldi ekki eina einustu flugvél á fyrsta degi.  Airbus aftur á móti skýrði frá samningi um kaup á 24 þotum af gerðinni A320 fyrir 1,9 milljarða dollara.

Þá skýrði Airbus frá því í dag, að ótilgreindur aðili í Asíu hefði keypt einkaþotu af gerðinni A320 Prestige.

Það sem af er ári hefur Boeing tekið við pöntunum í 73 farþegaþotur. Flugfélög hafa hins vegar fallið frá kaupum á 66 svo raunveruleg sala Boeing frá áramótum eru aðeins 7 þotur. Á sama tíma hefur Airbus tekið við 56 pöntunum en að frádregnum afpöntunum er hrein sala 35 þotur frá áramótum.

Risarnir tveir þurfa þó ekki að örvænta því á pöntunarlistum þeirra eru tæplega 3.500 þotur til afhendingar á nokkrum næstu árum.

Þrátt fyrir að ekki hafi um árabil verið tilkynnt um jafn fáa og litla samninga á stórri sýningu sem þessari segja flugvélasmiðirnir horfur í flugi til næstu ára vera góðar. Í ljósi samdráttar í flugi síðustu misseri væri þó engra stórsamninga að vænta á sýningunni.

Til samanburðar var tilkynnt um samninga um smíði flugvéla fyrir 25 milljarða dollara á fyrsta degi flugsýningarinnar í Farnborough í Englandi í fyrra. Og á Parísarsýningunni fyrir tveimur árum, sem ég var viðstaddur, var skrifað undir samninga um kaup á nokkur hundruð þotum fyrir stjarnfræðilegar upphæðir.

Fyrir utan þoturnar 24 sem Airbus seldi í gær samdi Rolls Royce við Gulf Air um að sjá félaginu fyrir hreyflum í 20 Airbus A330-þotur fyrir 1,5 milljarða dollara. Og ungverska flugfélagið Malev skuldbatt sig til að kaupa 30 svonefndar Superjet 100- þotur af rússneska flugvélaframleiðandanum Súkhoj fyrir um milljarð dollara. Malev er nú í eigu rússnesks ríkisbanka, Vnesheconombank.

Loks skýrði kanadíski flugvélasmiðurinn Bombardier frá samningi við spænska flugfélagið Air Nostrum um staðfest kaup á 35 CRJ1000-þotum fyrir 1,75 milljarða dollara.

Sýningin stærri en nokkru sinni áður 

Þrátt fyrir allt er Parísarflugsýningin áfram langstærsta flugsýning veraldar. Hafa sýnendur aldrei verið fleiri en í ár, eða rúmlega 2000. Ný fyrirtæki er þar að finna frá nýjum sýningarlöndum, eins og Ástralíu, Litháen, Mexíkó, Líbýu og Túnis. Bæta þau að hluta til upp fjarveru tveggja stórra flugvélaframleiðenda, Gulfstream og Cessna.

Miðað við sýninguna 2007 verða flugatriði í loftrými Le Bourget-vallarins færri nú. Hið sama er að segja um fjölda sýningargripa, færri vélar eru nú til sýnis en 2007.  Tveir sýningargripir eru í París í  fyrsta sinn, rússneska farþegaþotan Superjet100 frá Súkhoj og svonefndur Scheibel Camcopter, sem er mannlaus þyrla. Er hún fyrsta mannlausa farþega- og flutningaflygildið sem sýnt er á flugi á flugsýningu.

 

Schevchenko sagður vilja til Mónakó

Chelsea hefur haft samband við nokkur af helstu knattspyrnufélögum Frakklands og boðið þeim Andrei Shevchenko, leikmann ársins í heiminum 2004. Lyon, Marseille og Mónakó hafa fengið boðið og mun síðastnefnda félagið vera líklegast til að hreppa hann.

Frá þessu segir í dag í stærsta blaði Frakklands,  Ouest-France. Shevchenko mun vera náinn vinur Alexei Fedorichev, forstjóra Fedcom, helsta styrktarfyrirtækis Mónakófélagsins. Blaðið segir úkraínska leikmanninn tilbúinn að taka á sig helmings launalækkun, úr 8 milljónum evra á ári í 4, til að komast í frönsku fyrstu deildina.

Í sama blaði segir, að ítalska félagið Inter í Mílanó hafi falast eftir Karim Benzema frá Lyon. Í staðinn fyrir hann bjóðist Inter til að láta Lyon hafa Vieira og Mancini og 20 milljónir evra að auki Pa   

Fróðlegt verður að sjá hvernig þessum hugsanlegu leikmannaskiptum reiðir af.

 

Sjóræningjastarfsemin stjórnarskrárvarin

Stjórnlagaráðið í Frakklandi hefur reist skorður við þeim áformum ríkisstjórnarinnar að uppræta svonefnd sjóræningjastarfsemi á netinu. Það ætlaði hún að gera með sérstakri stofnun, netlöggu,  sem átti að geta lokað fyrir nettengingu þeirra sem sækja sér tónlist og kvikmyndir af netinu án þess að borga fyrir.

Lög um þetta voru samþykkt í þinginu í maí og gerði ég grein fyrir þeim þá. Nú segir stjórnlagaráðið þau stangast á við stjórnarskrána. Ekki gangi að einhver opinber stofnun geti lokað fyrir netaðgang fólks. Hún gæti í mesta falli aðvarað sjóræningjana en ekki refsað þeim. Það verði að vera hlutverk dómstóla að úrskurða hvort lokað skuli fyrir netaðgang viðkomandi einstaklinga.

Sarkozy forseti studdi Hadopi-lögin svonefndu  en stjórnarandstaðan með Sósíalistaflokkinn í fararbroddi lagðist gegn þeim. Hagsmunasamtök tónlistarmanna, leikara og fleiri fögnuðu tilraunum stjórnar Sarkozy til að stöðva ólöglega dreifingu efnis sem varið væri höfundarrétti.

Andstæðingar laganna hafa haldið því fram, að óheftur aðgangur að netinu ætti að vera meðal grundvallar réttinda og persónufrelsis. Sáu þeir líka fyrir sér í hinni nýju stofnun ógnvekjandi eftirlit með nethegðan fólks.

 

Átti að punta listann og hafnaði því sæti á Evrópuþinginu

Úrslit kosninga til Evrópuþingsins í Frakklandi urðu óþægilega góð að einu leyti fyrir Nicolas Sarkozy forseta. Einn af nánustu samverkamönnum hans til margra ára, Brice Hortefeux, var settur í þriðja sæti á lista flokksins í kjördæmi í miðhluta Frakklands. Það var meira til skrauts og til styrkingar listanum. Hún reyndist full mikil því öllum á óvænt náði Hortefeux kjöri - en ætlaði sér aldrei á Evrópuþingið.

Það var úr vöndu að ráða fyrir Sarkozy. Hann mátti ekki við að missa atvinnumálaráðherra sinn úr stjórninni og ekki gat hann haft hann á báðum stöðum, í París og Brussel eða Strasbourg. Allra síst vegna þess að hann ætlaði foringjum Evrópuþingsframboðsins, Michel Barnier og Rachida Dati, ekki að sitja í stjórninni og gegna jafnframt þingmennsku.

Þess vegna kom það eiginlega engum á óvart þegar skýrt var frá því í dag, að Hortefeux hefði gefið þingsætið frá sér.

Hortefeux sat á Evrópuþinginu 1999 - 2005 og fulltrúar UMP-flokksins segja, að hafi hugur hans staðið til að taka þar sæti á ný hefði hann leitt lista flokksins í kjördæminu.

 

Franskir hægrimenn og umhverfissinnar sigra - Sósíalistar gjalda afhroð

Franskir hægrimenn (UMP) og umhverfissinnar (Europe Ecologie) fögnuðu sigri í kosningum til Evrópuþingsins, sem fram fóru í gær. Sósíalistar (PS) guldu afhroð - ekki síst á Parísarsvæðinu - og einnig flokkur Francois Bayrou (MoDem).  Úrlitin þykja sigur fyrir stjórn Nicolas Sarkozy forseta þar sem ekki tókst að snúa óánægju vegna efnahagskreppunnar gegn stjórn hans. Flokkur hans fékk um 27,87%  atkvæða og 29 menn á Evrópuþingið, hafði 18. EE fékk 16,28% atkvæða og 14 þingmenn, hafði 6. Sósíalistar fengu nánast sömu atkvæðatölu, 16,48%, og 14 þingmenn líka, en höfðu 31.

MoDem, flokkur Bayrou, fékk 8,45% atkvæða og 6 þingmenn en hafði 10. Þjóðfylking Jean-Marie Le Pen hlaut 6,3% fylgi eða helmingi minna en 2004 og 3 þingmenn en hafði 7. Var Le Pen endurkjörinn. Hægrimaðurinn Philippe de Villiers náði endurkjöri fyrir flokk sinn sem fékk 4,6% atkvæða og 1 þingmann en hafði 3.  Vinstrifylkingin, kosningabandalag  Jean-Luc Melenchons og Kommúnistaflokksins fékk 6,0% og 4 þingmenn, hafði 3.  Flokkur Olivier Besancenot, Anti-kapítalistaflokkurinn (NPA), hlaut 4,9% atkvæða og enga þingmann, hafði engan áður. NPA var lengi með einn mann inni en þegar endanleg úrslit lágu fyrir í morgun hafði hann flust yfir til hægriflokksins  Diverse Droite sem hlaut 6,7% atkvæða.

Þátttakan í kosningunum í Frakklandi var aðeins 40,48%. Var ögn meiri fyrir fimm árum eða 42,76%.

Margir frammámenn í PS sögðu úrslitin alvarlegar ófarir sem draga yrði lærdóm af. Pierre Moscovici sagði gjörbreytinga þörf, í ætt við breytingar sem Sarkozy hefði gert á UMP á sínum tíma. Án uppstokkunar og nýrra viðhorfa myndi PS deyja út. Aurelie Filipetti, náin stuðningskona Segolene Royal, sagði afrakstur PS jafngilda pólitískum náttúruhamförum. „Nú í kvöld er staðreyndin sú, að Sarkozy vann kapphlaupið og stjórnarandstaðan, sem er í meirihluta í landinu, er í tætlum,“ sagði Moscovici á kosningakvöldi ríkissjónvarpsstöðvarinnar France2.

Sósíalistar gjalda afhroð á Parísarsvæðinu

Einkar sár þótti sósíalistum niðurstaðan í París þar sem flokkurinn hefur verið öflugur undir forystu Bertrand Delanoe borgarstjóra. Fékk hann langleiðina helmingi færri atkvæði en UMP og tapaði einnig í öllum 20 hverfum borgarinnar fyrir Europe Ecologie, flokki Daniel Cohn-Bendit.  Moscovici sagði þessa niðurstöðu vera "jarðskjálfta".

Sósíalistar háðu kosningabaráttu sína fyrst og fremst með því að ráðast gegn Sarkozy og stjórn hans. Hvöttu til þess að dómur yrði felldur yfir verkum hennar vegna efnahagskreppunnar. Hófsamur frammámaður í PS, þingmaðurinn Manuel Valls, sagði það hafa verið misheppnaða pólitík, úrslitin sýndu það. Hefði það háð sósíalistum að hafa ekki einbeitt sér að Evrópumálum í stað þess að ráðast að Sarkozy.

Flokksformaðurinn Martine Aubry var auðmjúk í ávarpi er niðurstaðan var ljós. Sagði flokk sinn enn sem komið væri ekki þykja nógu trúverðugan og þurfa ganga í gegnum gagngera endurnýjun. „Ég tek ábyrgð á þessu og leita ekki utanaðkomandi skýringa. Úrslitin eru ákall til okkar sem ég skil og tek undir,“ sagði Aubry. Og sagði PS þurfa einhenda sér í að skapa sér nýja stefnu er kæmi til móts við „vonir og væntingar“ þjóðarinnar. Hefur miðstjórn PS verið kvödd saman annað kvöld en þar er t.a.m. búist við að Segolene Royal tjái sig fyrst um úrslitin. 

Persónulegt áfall fyrir Bayrou 

Niðurstaða kosninganna þykja einkar slæmar fyrir François Bayou. Hið sama átti við um flokk hans og PS að uppskeran er langt undir því sem kannanir höfðu bent til. Þær höfðu bent til 11-14% fylgis en flokkurinn fékk 8,4%.

Vegna sundrungar í röðum Sósíalistaflokksins allt frá forsetakosningunum 2007 hafði Bayrou gert sér vonir um að draga PS uppi nú og styrkja stöðu sína með tilliti til forsetakosninganna 2012; verða þar öflugasti valkosturinn gegn Sarkozy.

Af Bayrou hálfu snerist kosningabaráttan mikið til um gjörðir Sarkozy á forsetastóli en ekki Evrópukosningarnar. Þegar ítrekaðar skoðanakannanir sýndu að hann þyrfti að auka fylgið verulega til að draga á PS hóf hann harðan áróður gegn skoðanakönnunum. Sagði þær vera tól Sarkozy og niðurstöðum þeirra hagrætt gegn sér. Niðurstaðan er að þær sýndu flokk Bayrou með allt að 50% meira fylgi en hann fékk og engin þeirra var neitt í líkingu við uppskeru flokksins. Þykja úrslitin mikill persónulegur ósigur fyrir Bayrou og ef eitthvað er; skaðað hann gagnvart næstu forsetakosningum, 2012. 

Þessu til viðbótar er hann og talinn hafa tapað á persónulegum árásum á Cohn-Bendit í sjónvarpsþrætu þeirra sl. fimmtudagskvöld. Erfitt er að segja til um áhrif þess en sýnt þykir að eitthvað af stuðningsmönnum MoDem hafi snúið baki við Bayrou eftir það og farið yfir til EE.

Kaghýddir með eigin vendi?

Uppskera flokks Sarkzoy er í anda skoðanakannana síðustu vikurnar. Samkvæmt þeim jóks fylgi hans eftir því sem nær dró kjöri, ef eitthvað er. Ráðherrarnir Brice Hortefeux, Michel Barnier og Rachida Dati sögðu tíðindi kosninganna þau, að kjósendur hefðu lagst með þeim flokkum sem buðu upp á tillögur og stefnu í málefnum Evrópu en hafnað flokkum sem hefðu aðeins boðið upp á gagnrýni á Sarkozy og hvatt hefðu kjósendur til að refsa ríkisstjórn hans. Xavier Bertrand, formaður UMP,  sagði að vopnin hefðu snúist í höndum sósíalista og þeir í raun verið kaghýddur með eigin refsivendi.

Hortefeux, Barnier og Dati náðu öll kjöri til Evrópuþingsins og hverfa því væntanlega von bráðar úr stjórn Sarkozy.