Hraður samdráttur í neyslu borðvíns í Frakklandi

Að meðaltali drekkur hver Frakki eitt glas af borðvíni á dag, að sögn landbúnaðarráðuneytisins í París. Fyrir 50 árum var neyslan þrjú glös að meðaltali. Því þykir samdrátturinn ógnar hraður og ógnvekjandi, í þessu rótgróna vínframleiðslulandi.

Til að setja þetta í annað samhengi drakk meðaltals Frakkinn 120 lítra af borðvíni á ári fyrir hálfri öld en í dag 43 lítra. Milli áranna 2007 og 2008 minnkaði neyslan um 4 lítra á mann. Meðal skýringa á samdrættinum er mikill áróður um óhollustu óhóflegrar drykkju og strangari ákvæði um áfengismagn í blóði undir bílstýri.

Hér þykir um áhyggjuefni að ræða fyrir vínbændur og ekki er útlitið gott á krepputímum. Þannig benda tölur til þess að neyslan innanlands á fyrsta fjórðungi ársins sé 15% minni að magni en á sama tíma í fyrra og 28% verðminni.

Samkvæmt talnafræði hagstofu landbúnaðarráðuneytisins neyta 35 ára og yngri þrisvar sinnum minna víns en meðal-Frakkinn. Hins vegar drekka 50-64 ára tvöfalt meira en hann.  

Árið 2008 kostaði flaska af rauðvíni að meðaltali 3,54 evrur út úr búð. Tveir þriðju vínsölunnar innanlands í Frakklandi fer fram í stórmörkuðum.  Nam sala þeirra á borðvínum í fyrra 3,32 milljörðum evra.

Það er ekki einungis neyslan sem dregist hefur saman, heldur framleiðslan einnig. Þannig telst landbúnaðarráðuneytinu í París til, að uppskeran hafi numið 42 milljónum hektólítra í fyrra. Var það minnsta framleiðsla í 15 ár.

 

Vilja ekki blanda hvítvíni og rauðvíni til að búa til rósavín

Franskir, ítalskir, spænskir og svissneskir vínbændur mættu í höfuðstöðvar Evrópusambandsins í Brussel í dag til að ítreka andstöðu sína við að sambandið samþykki framleiðslu rósavíns með blöndun rauðvíns og hvítvíns.   

Búist er við að sérfræðinganefnd á vegum sambandsins taki afstöðu til málsins annað hvort 19. eða 26. júní nk.  Vínbændur halda því fram, að með því að leyfa framleiðslu á rósavíni með blöndun hvítvíns og rauðvíns breytist vínframleiðsla í eðli sínu. Verði ekki lengur handverk einstaklinga heldur að iðnaðarstarfsemi.

Óttast þeir að umskiptin leiði til mikils atvinnuleysis í greininni og hefðbundin rósavín muni jafnvel líða undir lok.

„Við okkur blasir klónuð afurð, með breyttu eðli er rugla mun neytendur í ríminu,“ sagði forseti gæðaeftirlits spænskra vínbænda í Brussel í dag. Fulltrúi samtaka svissneskra vínbænda spurði hvort næsta skrefið yrði ekki það, að leyfa litun víns með gervilitum.

Framleiðsla rósavíns með blöndun hvítra og rauðra vína hefur verið ástunduð af vínframleiðendum í löndum eins og Ástralíu og Suður-Afríku.

Framkvæmdastjórn Evrópusambandsins hefur reynt þá málamiðlun að hefðbundin rósavín yrðu sérmerkt sem slík. Það átti ekki upp á pall hjá bændum. Franska stjórnin hefur tekið undir með vínbændum og nýtur einnig stuðnings grískra og ítalskra stjórnvalda. Þurfa þessi ríki einnig á stuðningi Þjóðverja og Spánverja að halda til að eiga möguleika á að koma í veg fyrir framleiðslu rósavíns með blöndun rauðvíns og hvítvíns.

 

Skarð fyrir skildi við brottför Juninho frá Lyon

Þá er það staðfest, sem legið hefur í loftinu, að brasilíski miðvallarleikamaðurinn Juninho er á förum frá Lyon. Þangað kom aukaspyrnusnillingurinn árið 2001 og hefur unnið sjö Frakklandsmeistaratitla með liðinu - og það í röð - og einn bikartitil.

Juninho er 34 ára að aldri og hefur leikið 344 leiki með Lyon. Um helgina skoraði hann sitt 100. mark fyrir liðið, á heimavelli  gegn Caen, og var ákaft hylltur af áhorfendum. Um nokkurra ára skeið hefur hann verið fyrirliði Lyon.

Það er eftirsjá af þessum kraftmikla og snjalla leikmanni, sem 44 sinnum hefur klæðst landsliðstreyju Brasilíu. Í fljótu bragði sé ég ekki hver ætti að fylla skarð hans svo vel sé. Yfirleitt er þó svo, að maður kemur í manns stað í boltanum.

Það eina sem vantar á er að Juninho kveðji sem meistari, en sú von er úr sögunni. Þegar aðeins ein umferð er eftir í frönsku deildinni er Bordeaux með pálmann í höndum, með þremur stigum meira en Marseilles, 77:74 og Lyon er í þriðja sæti með 70 stig. Á laugardaginn kemur lýkur deildinni; Bordeaux fer til Caen og Marseilles tekur á móti Rennes heima.   

Juninho átti eitt ár eftir af samningi við Lyon en fær sig nú lausan allra mála og frjálst að ráða sig hvert sem er. „Hann bað í gær um lausn undan samningi. Fyrir allt sem hann hefur gert fyrir liðið og allt sem hann er tákngervingur fyrir fannst okkur sanngjarnt að verða við því,“ sagði Jean-Michel Aulas stjórnarformaður Lyon við blaðamenn í dag.  „Juni er á förum,“ bætti hann við.  Vinsamleg orð Aulas snertu taugar leikmannsins sem sat við hlið hans og vatnaði músum.

 

60.000 boltar

Opna franska tennismótið hófst á Roland-Garros tennissvæðinu í París um helgina. Ekki gerði ég mér grein fyrir því hvað marga tennisbolta þarf í móti sem þessu. Sá það í blaðinu mínu, að keppendur nota hvorki fleiri né 60.000 bolta meðan á mótinu stendur.

Ætli þeir teljist svo ekki annað hvort ónýtir eða í besta falli nýtilegir til æfinga þegar mótið er afstaðið?

Roland-Garros mótið stendur yfir í tvær vikur og er meðal þeirra stærstu í heiminum. Íþróttin er gríðarlega vinsæl hér í Frakklandi sem keppnisgrein og frístundaiðkun.

Í ár beinist athyglin fyrst og fremst að Spánverjanum Rafael Nadal. Spurningin sem allir spyrja er hvort hann vinni mótið fimmta árið í röð. Slíkt hefur engin afrekað. Nadal hóf leik í gær og þurfti lítið fyrir brasilískum keppanda að hafa, lagði hann í þremur settum.

Nadal vann sinn 29. leik á Roland-Garros í gær sem er met. Og athyglisvert er að í þeim öllum hefur hann einungis tapað 7 settum. Og enginn leikurinn hefur teygst fram í fimmta sett, þeim hefur í mesta lagi lokið í fjórða setti, oftast í því þriðja!   

Önnur megin spurning í tengslum við mótið er hvort svissneski tenniskappinn Roger Federer takist að bæta sigri í Roland-Garros í safnið. Hann hefur unnið öll stórmótin í tennis á ferlinum, sum hver mörgum sinnum, nema í Roland-Garros.

Keppnin hefur ekki farið alltof vel af stað fyrir Frakka. Ein helsta stjarna þeirra, Amelie Mauresmo, féll úr leik í fyrstu umferð gegn þýskri stúlku.

Króatinn Ivo Karlovic féll úr leik með því að tapa fyrir Bandaríkjamanninum Lleyton Hewitt í fimm setta leik. Karlovic setti þó met í sögu stórslemmumóta, hlaut samtals 55 ása í leiknum. Gamla metið var frá 2005 og hljóðaði upp á 51 ás. Það átti hann sjálfur ásamt Svíanum Joachim Johansson. Karlovic setti það í opna ástralska mótinu en Johansson í Wimbledon.

Það vekur athygli, að rússneska tennisdrottningin fyrrverandi, Maria Sharapova, er mætt aftur til leiks, eftir tæplega árs fjarveru vegna meiðsla.

 

 

   

 

Franskir fangar fá sinn Tour de France

Frakkar eru ástríðufullir áhugamenn um hjólreiðar og stunda þær af miklu kappi, bæði sem keppni og sem holla hreyfingu og útivist. En fremur óvenjulegur hjólreiðatúr um landið hefst í borginni Lille í norðurhluta landsins í næstu viku.

Þann 4. júní leggja 196 fangar upp í hjólreið. Undir vökulu auga urmul varða á reiðhjólum og öðrum farartækjum munu þeir hjóla alls 2.300 kílómetra á 17 dögum. Fá þeir sem sagt sína útgáfu af Tour de France, er kalla mætti refsitúrinn, já eða Frakklandsfangareiðin.

Ólíkt Frakklandsreiðinni frægu verður harðbannað að slíta sig frá hópnum og stinga af til að koma fyrstur í mark á hverjum áfanga. Blátt bann liggur við slíku, af skiljanlegum ástæðum því fangarnir hafa ekki lokið afplánun refsingar sinnar.

Þetta er fyrsta fangareið sinnar tegundar. Meðan þeir verða utan múranna ber föngunum skylda til að halda hópinn á vegum landsins. Ekki verður um keppni af neinu tagi að ræða og engin verðlaun veitt. Tilgangurinn er að örva fangana til hópsamstarfs og að leggja hart að sér til að ná settu marki.

„Þetta er viss tegund af flótta eða undankomu fyrir okkur, tækifæri til að komast frá dags daglegum raunveruleika fangelsisins. Högum við okkur vel gætum við kannski fengið reynslulausn fyrr en ella,“ segir Daniel, 48 ára fangi í Nantes, sem tekur þátt í reiðinni.

Á hverri daglegri endastöð er að finna fangelsi. Þar þurfa hjólreiðarmennirnir ekki að taka á sig náðir heldur gista þeir á hótelum. Endamarkið verður í París líkt og í hjólreiðakeppninni frægu.

„Við viljum færa þátttakendum sönnur á, að með nokkurri þjálfun geta menn náð settu marki og hafið nýtt líf,“ segir talsmaður fangelsisyfirvalda um þetta nýstárlega uppátæki.