Frakkar taka íþróttagleði sína á ný

Frakkar tóku íþróttagleði sína á ný í dag. Hrakfarir og fíflalæti fótboltaliðsins á HM sviptu þá slíkri ánægju en hjólreiðagarpurinn Sylvain Chavanel breytti því öllu með sigri á áfanga dagsins í Frakklandsreiðinni (Tour de France).

Klæðist hann gulu treyjunni úr þessu og er með um þriggja mínútna forskot á Svisslendinginn Fabian Cancellara, sem skrýddist henni í gær eftir sigur í tímatökunni á fyrsta degi, laugardag.

Hjálpaði það Chavanel að öðlast þetta mikla forskot, að keppendaópurinn hægði á sér eftir að tugir keppenda flugu á hausinn á rennblautum og glerhálum vegi niður af Stockeu-fjalli. Með því að hægja ferðina, en þar lék Cancellara lykilhlutverki, gafst sem flestum knöpum tækifæri á að komast í hópinn aftur.

Niður fjallið fór Chavanel langt á undan og tók þar enga áhættu en með sigrinum er hann orðin þjóðhetja í Frakklandi. Og nógu öflugur keppandi er hann til þess að halda treyjunni einhverja  daga í viðbót.

Sigur Chavanel er athyglisverður sakir þess að í lok apríl slasaðist hann alvarlega í keppni í Belgíu en leið dagsins lá að hluta til um sömu vegi og þá. Meðal annars höfuðkúpubrotnaði hann og gat ekkert æft sig í nokkrar vikur. Í dag tók hann á rás og sleit sig frá hópnum eftir aðeins 11 kílómetra af 201. Fljótlega drógu nokkrir hann uppi og fylgdist sá hópur að nokkuð á annað hundrað kílómetra en enginn treysti sér með Chavanel er hann lét til skarar skríða og sótti til sigurs er 30 km voru í mark.

Meðal þeirra sem féllu af baki í dag voru Lance Armstrong, Alberto Contador og Andy Schleck sem taldir eru einna sigurstranglegastir í Frakklandsreiðinni. Lítið hefur spurst út um meiðsl þeirra eða hvaða áhrif þau hafa á framhaldið.

Liðsfélagi Chavanel, Jérôme Pineau, kórónaði svo daginn fyrir Quickstep-liðið með því að vinna doppóttu treyjuna sem stigahæsti klifrarinn skrýðist jafnan.

   

Túrinn af stað í 97. sinn

Þá er ljóst hvað bíður manns næstu þrjár vikurnar eða svo; langlega í sófanum fyrir framan imbann. Tour de France, Frakklandsleiðin, er að renna upp, en keppnin hefst í dag. Þó ekki í Frakklandi heldur í Rotterdam í Hollandi. 

Eins og um árabil verða keppnisliðin 22 og níu menn í hverju. Margir sem sagt til kvaddir en fáir útvaldir. Stóru nöfnin auðvitað með, Armstrong, Contador, Schleck-bræður, Hushovd, Cancellara, Cavendish, Cadel Evans, svo einhverjir séu nefndir af þeim sem helst þykja til greina koma sem handhafar gulu treyjunnar þegar upp verður staðið á Champs-Élysées breiðgötunni í París eftir þrjár vikur.

Túrinn er mikið dæmi og fékk ég nasasjón af því er ein leiðin lá rétt hérna við nefið á mér í hitteðfyrra. Hersingunni fylgja 650 blaðamenn frá 350 fjölmiðlum eða fréttveitum, 260 kvikmyndatökumenn og ljósmyndarar, 75 útvarpsstöðvar, 1.800 tæknimenn og bílstjórar. 

Framundan eru 20 keppnisdagar, þar af sex í miklu og bröttu fjalllendi í Ölpunum og Pýrenneafjöllum. Klífa hjólagarparnir þá 23 tinda af þremur erfiðustu gráðum. Á fjórum öðrum dagleiðum í hæðóttu landslagi bíða þeirra einnig fjórir slíkir tindar.

Ekki ætla ég að veðja á einhvern sérstakan. Vona bara að franskir knapar vinni eitthvað af dagleiðum en af þeim held ég einna mest upp á Thomas Voeckler, með rásnúmer 151. Hann sló í gegn 2004 og skrýddist þá gulu treyju forystusauðarins í nokkra daga. Þá vann hann eina dagleið, hina fyrstu á ferlinum í Túrnum, í fyrra.

Armstrong hefur verið að gera góða hluti udanfarnar vikur og er líklega öflugri en í fyrra. Hann varð þriðji í Lúxemborgartúrnum á dögunum, síðan annar í svissneska túrnum fyrir um hálfum mánuði. Og því þá ekki í fyrsta sæti nú? Yngri menn eins og Andy Schleck og Alberto Contador munu þó láta hann finna fyrir sér og sama er hvernig fer; menn þurfa sýnist mér að hafa meira fyrir fyrstu sætum í ár en í fyrra, miðað við úrslit móta í vor og sumar.

Fróðlegt verður að sjá hvernig Alexander Vinokourov kemur út en hann hefur látið fyrir sér finna í keppni í sumar, kominn til baka eftir tveggja ára keppnisbann vegna lyfjanotkunar. Þeir eru í sama liði, Contador og hann, Astanaliðinu sem á sínum tíma var stofnað um Vino.

Já, fjörið byrjar síðdegis. 

Hér er að finna allt sem vita þarf um Tour de France.

 

 

Styrkari staða gagnvart hjólreiðamaraþoni

Það var heljarinnar þrekraun 400 kílómetra hjólarallið sem ég þreytti á Bretaníuskaganum um nýliðna helgi. Aldrei áður hef ég hjólað jafn langt í einum áfanga og aldrei áður að nóttu til. En með þessu hef ég styrkt mjög stöðu mína og öðlast næstbesta forskráningarrétt fyrir þolreiðina miklu á næsta ári, frá París til Brest og til baka. Þar er hjóluð ríflega 1.200 km vegalengd sem verður að klára á innan við 90 klst. Heildar klifur í brekkum á leiðinni mun nema 10 kílómetrum og því var rúmlega 4000 metra klifur um helgina ágæt prófraun.

 Að þessu sinni var um að ræða hjólarall frá bænum Saint-Méen-le-Grand en þaðan er ein frægasta stjarna franskra hjólreiða fyrr og síðar, Louison Bobeti. Hófst keppnin við virðulegt gamalt og stórt hús sem geymir safn sem við hann er kennt og helgað er afrekum hans og lífi og starfi. Leiðin lá um allar fjórar sýslur Bretaníu; Morbihan, Finistere, Côtes-d’Armor og Ille-et-Vilaine.

Tvisvar, þrisvar áður hef ég lagt af stað í langrall í myrkri klukkan 5 að morgni, en að þessu sinni var byrjað klukkan 18 og hjólað gegnum nóttina. Það var undarleg reynsla og eftirminnileg. Verst að við hjóluðum um sveitir sem örugglega hafa verið mjög snotrar en af því sást ekki neitt. Engin lýsing er með vegum og meira að segja eru götuljós slökkt í minni bæjum og borgum í sparnaðarskyni í nokkrar klukkustundir á nóttunni.

Þess vegna getur verið hálf draugalegt að vera á ferð, og eykur bara á dulúðina ef rignir en segja má að ekki hafi stytt upp frá því klukkan 19 og fram til þrjú um nóttina, eða í átta klukkustundir. Sem betur fer var hún lengst af létt, lítið annað en úði. En hvimleið samt og verður athyglin að vera meira en í góðu lagi við aðstæður sem þessar þegar hjólað er í hóp því ef t.d. þarf að beita bremsum virka þær mun hægar en ella vegna vætunnar á felgunum og í bremsuklossunum.

Næturreiðin var að þessu leyti lærdómsrík því þá ríkti nánast þögn í hópnum allan tímann, klukkustund eftir klukkustund. Í dagsbirtu spjalla menn gjarna saman á ferð en það gjörbreyttist undir klukkan 23 þegar kolsvart myrkrið var skollið á. Ástæðan var náttúrulega sú, að athyglin varð að vera óskipt við eigið hjól og fólkið fyrir framan mann og til hliðar, enda lítið meira en hálf hjólslengd í næsta mann (eða konu, þær voru tvær eða þrjár í 85 þátttakenda hópi).

Ég hafði nokkrum sinnum áður hjólað 300 km í einni lotu, í 600 km ralli í fyrra frá Rennes til Brest og til baka, en þá lagði ég mig nokkrar stundir á milli ferðanna enda langt innan tímamarka sem keppendur höfðu til að klára rallið. Þá tók ég þátt í 300 km ralli í apríl og eins í fyrra, en þá villtumst við nokkrir í myrkri í byrjun, tókum eins og 30 km aukakrók og fórum því röska 330 km! Var það sem sagt lengsta reið mín þar til nú. 

400 km rallið var einkar ögrandi viðfangsefni og kallaði á góðan undirbúning og slurk af heilbrigðri skynsemi. Líkamlega kveið ég engu því að baki frá áramótum voru tæplega 5.700 kílómetrar á hjólhesti mínum. Hins vegar ríkti bæði eftirvænting og e.t.v. pínulítill kvíði gagnvart því að hjóla gegnum nóttina. Myndi hópur sem maður væri í stoppa ef það púnkteraði (það orð var alltaf notað á æskuárunum á Raufarhöfn þegar dekk sprakk)? Eða tæki þá við einmana reið þar sem maður nyti ekki lengur sameinaðra krafta hópsins við að skiptast á að leiða og rata? Á þessar spurningar reyndi ekki þar sem ekki sprakk hjá mér. Það kom hins vegar fyrir tvo samferðarmenn – og þá var auðvitað stoppað enda tekur ekki nema um 10 mínútur að skipta um slöngu og hjólamenn yfirleitt það hjartagóðir að þeir skilja menn ekki eftir eina í reiðileysi við aðstæður sem þessar.

Fyrir utan að þurfa vera í góðri æfingu til að hjóla slíka vegalengd þarf að passa upp á að nærast vel og drekka á leiðinni – og vera með nesti því að nóttu til, aðfaranótt sunnudags, er hvergi neitt í gogg að fá. Ég útbjó nestisskammt sem ég bar í litlum bakpoka; sex litlar samlokur sem ég sporðrenndi á 50 km fresti, súkkulaði, orkustengur og þar fram eftir götunum. Gekk planið nokkuð vel upp og ekki mátti minna vera – góð reynsla til að byggja á síðar.

Síðast, en ekki síst, þarf mikla þolinmæði við jafn ögrandi áskorun sem 400 km hjólreiðarall. Númer eitt, tvö og þrjú er að hafa lund til að halda aftur af sér og hjóla undir þeim hraða sem maður annars telur sig ráða við. Ekki síst til að byrja með og helst alla leið, ef vel á að fara. Ég á því ekki að venjast að rúlla á 25-26 km hraða og nokkru hægar upp brekkur. En því lengra sem hjólað er því meiri nauðsyn að halda aftur af sér, ætli maður alla leið í mark.

Þess vegna var meðalhraðinn yfirleitt ekki nema um 25 km/klst þegar ég tékkaði. En það lifnaði aðeins yfir tempóinu þegar um 250 km voru að baki, og ekki síst eftir að tók að birta. Um svipað leyti splundraðist hópurinn sem ég hafði lengst af verið með. Þegar um 90 km voru eftir vorum við aðeins þrír eftir í honum sem héldum saman.Um 50 km frá marki sleppti ég þeim, lagði ekki eins hratt í um tveggja km langa brekku á borð við Kambana, enda þeir báðir mun yngri en ég og alla vega annar þeirra þrælsterkur. Kom  mér á óvart að sjá hann nota stærra tannhjólið að framan upp flestallar brekkur.

Ég gerði mér í sjálfu sér engar vonir um að ná þeim aftur, hugsaði bara um það eitt að halda vel á spöðunum sjálfur, halda góðum dampi sem eftir var, oftast gegn vindi, enda kominn á slóðir sem ég þekkti frá Rennes-Brest-Rennes rallinu frá í fyrrasumar. Eftir um 20 km sá ég hjólamann í gulu vesti um það bil kílómeter á undan. Og eftir því sem nær dró bænum þar sem síðasta kontról fór fram nálgaðist hann jafnt og þétt. Var þá annar fyrrum félaga minna þar á ferð og renndi ég í hlað á tékkstaðnum rétt á eftir honum. Urðu fagnaðarfundir en hann hafði sleppt þeim sterka 10 km seinna en ég. Ákváðum við að hafa samfylgd sem eftir var, ásamt einum náunga sem kom í tékkið miklu fyrr og safnaði þar kröftum. Sá sterki var að leggja upp í lokasprettinn þegar ég náði þeim í þessum bæ.

Já, ég tala um tékk, en maður verður að geta sýnt og sannað að maður hafi farið viðkomandi keppnisleið. Fær maður við upphaf ferðar nokkurs konar loggbók sem tékkstaðirnir hafa verið færðir inn í og það tímabil sem menn verða að fara um þá staði. Í fyrstu tveimur tékkbæjunum, Malestroit og Guemene sur Scorff í Morbihan, snöruðum við okkur inn á krár og fengum bækurnar stimplaðar og færðum inn komutíma. Á þeim  síðarnefnda renndum við í hlað 10 mínútum fyrir miðnætti.

Þar gáfu flestir sér tíma til að nærast og góður var vel sykraður kaffibolli fyrir nóttina. Á næstu þremur tékkstöðum var viðbúið að allt væri lokað. Því vorum við með sérstök póstkort stíluð á mótshaldara og merkt rallinu sem við gátum skrifað nöfn okkar og komutíma í viðkomandi bæ og sett í næsta póstkassa. Þau kort bærust mótshaldara strax eftir helgi og gæti hann þá gengið úr skugga um að allt væri eðlilegt enda geyma þeir loggbækurnar fyrst um sinn til að kanna að allt hafi farið fram samkvæmt ritúalinu.

Og auk póstkorts var boðið upp á að menn notuðu greiðslukort sitt til úttektar í hraðbanka á tékkstað og legðu fram kvittun við komu í lokahöfn enda væri á henni bæði nafn og staðsetning viðkomandi banka og tímasetningar. Póstkortið notuðum við í bænum Chateauneuf-de-Faou á Finistere, en þá voru 210 km að baki. Og loksins að stytta upp.

Næsta tékk var 30 km seinna, í bænum Huelgoat, sem var lengra til vesturs frá Saint-Méen-le-Grand en nokkur annar bær. Þar hafði ég farið um í fyrra í Rennes-Brest-Rennes rallinu. Er við renndum inn í miðbæinn í leit að banka fönguðu ljós í bakaríi athygli okkar. Vantrúaðir vorum við reyndar á að þar væri einhver klukkan 4:15 að morgni sunnudags. Bönkuðum á búðarglugga en fengum ekkert svar. Smokruðu einhverjir sér inn í húsasund við hliðina og knúðu dyra baka til. Var hurðinni hrundið upp nær samstundis og þar inni voru fjórir bakarar, þrír karlmenn og kona, á fullu.

Tóku þau okkur fagnandi og innsigli bakarísins var snimmhendis komið í loggbókina. Og til að kóróna huggulegheitin skelltu bakararnir bakka fullum af bakkelsi, súkkulaðibrauði  og rúsínusnúðum á borðið og buðu okkur að borða sem við gætum. Létu menn ekki segja sér það tvisvar því þarna var vænn skammtur af kaloríum í hverjum bita. Og þegar við vorum að ljúka við átið rann annar hópur í hlað, um 15 mínútum á eftir okkur, og naut einnig höfðingsskapar bakaranna. Þarna fóru a.m.k. 30 mínútur í tékk og bakkelsisát og framundan 97 km reið í næsta kontról, Loudeac í Côtes-d’Armorsýslu. Á þeim áfanga eru margar langar og þrælslegar brekkur fyrir menn sem verið hafa á ferð hátt í 300 km.

Enda tók um 15 manna hópurinn fljótlega að gliðna, ekki síst eftir að birta tók og ferðin að aukast. Losnuðu menn smám saman aftur úr uns við vorum þrír eftir. Komum við fyrstir saman til Loudeac á níunda tímanum og þar var hressandi að fá heitt súkkulaði og kók á krá og klára sem mest af því sem eftir var af nestinu, enda ekki nema röskir 60 km eftir. Smám saman dreif aðra samferðarmenn næturinnar að en nú var biðlund tekin að minnka og lögðum við þremenningarnir af stað án þeirra. Rúmum 10 km eftir þetta sleppti ég svo hinum ágætu Bretónum, eins og fyrr er nefnt, í brekku sem ég líkti við Kambana.

Strax í byrjun rallsins rauk um 10-15 manna hópur af stað og skar sig fljótt frá þeim hópum sem á eftir komu. Og áður en myrkrið skall á var hann horfinn sjónum. Í honum var sá sem fyrstur lauk rallinu, um klukkan 8:30 á sunnudagsmorgni. Það er eins og einhverjir úr þessum hópi hafi ekki þolað hraðann og dregist aftur úr því ég varð níundi í mark af 85 þátttakendum og Bretóninn sterki, sem ég margnefni, varð áttundi. Við kláruðum rétt fyrir hádegi og höfðum þá verið á baki vel á sextándu klukkustund. Um tvær klukkustundir fóru í tékkstoppin en við þau gáfu menn sér jafnframt tíma til að nærast og bíða jafnvel eftir öðrum til að stækka hópinn og þétta raðirnar, því mun auðveldara er fyrir hvern og einn að hjóla í hópi en vera einsamall. Á leiðinni reiknast mér til að ég hafi haft samfylgd af öðrum, misjafnlega mörgum en oftast talsverðum fjölda, í 365 kílómetra. Og aldrei einn á báti fyrr en eftir tæpa 350 km. Það var indælt.

Frá síðustu tékkstöðinni, í smábæ að nafni St. Vran, voru ekki nema 22 km eftir til Saint-Méen-le-Grand. Með goluna í bakið og næstum því flata leið var rúllað vel, sjaldnast undir 35-40 km/klst. Þvílík ánægja að renna inn í bæinn hans Bobet. Ég verð að skreppa síðar og skoða safnið hans.

Með þessu ralli hef ég styrkt enn stöðu mína gagnvart París-Brest-París keppninni í ágústlok á næsta ári. Kominn með næstbesta forskráningarrétt en vegna vinsælda er útlit fyrir að kvóti verði á þátttöku í fyrsta sinn. Þetta rall fer farm á fjögurra ára fresti og voru keppendur árið 2007 samtals 5311, þar af 2294 frá Frakklandi en meirihlutinn var frá 45 öðrum löndum. Er búinn að fara gegnum undankeppni (BRM) í 200 km, 300 km og 400 km. Til álita kemur að fara svo 600 km í sumar, en svona röll þarf ég að fara aftur í gegnum á næsta ári til að fullgilda skráningu í P-B-P. Sem sagt, eitthvað til að vinna að og stefna næstu 15 mánuðina eða svo!

Úrslit verða ekki keypt fyrir peninga - það sannaði Lyon í Madríd

Það var ekki leiðinlegt að standa upp frá sjónvarpinu er flautað var til leiksloka í viðureign Real Madrid og Lyon í meistaradeild Evrópu í gærkvöldi. Stjörnur spænska liðsins gengu sneyptar af velli en Lyon komst áfram í 8 liða úrslit.

Mér skilst, að samanlögð mánaðaraun allra leikmanna Lyon séu minni en mánaðarlaun Ronaldo eins og sér hjá Madríd. Og verðmæti allra leikmanna Lyon mun ekki eins mikið og Real borgaði fyrir hvort sem er Kaka eða Ronaldo í fyrrasumar. Þeir eru vissulega góðir, sérstaklega Ronaldo, sem mikið er treyst á, en það dugði ekki.

En franska liðið var þó ekkert lakara en milljarðalið Madrídar. Heimamenn áttu fyrri hálfleikinn en dæmið snerist alveg við í þeim seinni. Eftir að hafa legið undir hverri ágjöfinni á fætur annarri fyrstu 45 mínúturnar sýndu Frakkarnir að sókn er besta vörnin; þeir stjórnuðu spilinu, hrifsuðu knöttinn hvað eftir annað af heimamönnum á þeirra eigin vallarhelmingi og kæfðu margar sóknir þeirra þannig í fæðingu.

Real Madríd náði forystu á 6. mínútu og virtist ætla að mala lið gestanna, sem gafst þó aldrei upp. Og það var eins og vindur færi úr heimamönnum í hálfleik og í byrjun þess seinni mættu þeir mun samstilltara liði baráttuglaðra gestanna.

Það lá í loftinu lengst af að Lyon myndi skora. Tvisvar til þrisvar klúðruðu þeir þó nánast opnum dauðafærum og jöfnunarmarkið lét á sér standa. Spennan hélst því lengi eða þar til hinn bosníski Pjanic jafnaði  á 75. mínútu. Og þar sem Lyon vann fyrri viðureignina 1:0 þurftu Madrídingar að skora tvö á síðasta kortérinu til að komast áfram.

Að þessu sinni verður ekki sagt að úrslit hafi verið keypt fyrir peninga. Um 50 milljarða króna risafjárfestingar Real Madrid í fyrra máttu sín lítils. Davíð hinn fjárgranni spilaði betri fótbolta og sigraði Golíat.

Það er ekki laust við að púkanum á fjósbitanum hafi verið skemmt aðeins en mér hefur lengi blöskrað peningadellan í íþróttum. Ekki bara fótboltanum, heldur öllu sporti. Hefur það verið til góðs? Það hef ég lengi haft efasemdir um. Við íþróttahreyfinguna eina og sér er þó ekki að sakast. Þar er hlutur sjónvarpsstöðva sem keppst hafa um að sýna frá hvers kyns íþróttum ekki minni en vissulega hafa þær slegist harðast um vinsælasta efnið, fótboltann.

 

Loeb meistari meistaranna

Frakkar eiga úr vöndu að ráða þegar þeir velja íþróttamann ársins. Margan eiga þeir góðan afreksmanninn, bæði einstaklinga og flokka. Í ár hefur rallökumaðurinn Sebastien Loeb orðið fyrir valinu, en hann hlaut sæmdarheitið meistari meistaranna einnig í hitteðfyrra.

Loeb bar að þessu sinni sigurorð af handboltalandsliðinu sem hefur ekki af litlu að státa, ólympíugulli frá í fyrra og heimsmeistaratitli í ár. Íþróttamaður ársins í fyrra varð sundmaðurinn Alain Bernard en Loeb hlaut titilinn árið 2007.

Hann er vel að honum kominn því í ár sló hann öll met rallaksturs - og jafnvel akstursíþróttanna - með því að vinna heimsmeistaratitil ökuþóra sjötta árið í röð á Citroenbíl sínum. 

Loeb, sem haft hefur Mónakómanninn Daniels Elena sem aðstoðarökumann, hlaut 842 stig í kjöri L'Equipe. Handboltalandsliðið hlaut 692 stig og í þriðja sæti varð ungi júdómeistarinn Teddy Riner með 433 stig.

Sigursæli siglingagarpurinn Michel Desjoyeaux varð fjórði með 220 stig en hann vann m.a. síðustu kappsiglingu umhverfis hnöttinn, svonefnda Vendee Globe keppni. Í

fimmta sæti knattspyrnumaðurinn Thierry Henry með 218 stig og kvennalandsliðið í handknattleik, nýbakaðir silfurhafar á HM, í því sjött með 190 stig. Skíðamaðurinn  Jean-Baptiste Grange hlaut 167 stig í sjöunda sæti og áttundi varð handboltamaðurinn Nikola Karabatic með 146 stig.

Fótboltamaðurinn spræki hjá Bordeaux, Yoann Gourcuff, varð níundi með 107 stig. Í tíunda sæti varð svo stangarstökkvarinn Renaud Lavillenie sem varð Evrópumeistari innanhúss á árinu og vippaði sér yfir sex metra sl. sumar.

Nýtt met á hjólinu

Þeim áfanga náði ég sl. sunnudag, 22. nóvember, að komast upp fyrir þá vegalengd sem ég lagði að baki á hjólhesti mínum í fyrra. Í lok morguntúrsins með félögunum stóð mælirinn í 12.250 kílómetrum frá síðustu áramótum. Allt síðastliðið ár lagði ég að baki 12.183 kílómetra. Og þar sem rúmur mánuður er eftir af árinu stefnir allt í að kílómetrarnir verði eitthvað á þrettánda þúsundið í ár.

Ánægður er ég með þessa þróun og sosum ekkert verið að sperrast því ég hvíldi mig tiltölulega vel á hjólinu í september. Veðurfarslega séð var það þó einn besti mánuður ársins til hjóla. En þótt þreyta hafi engin verið á ferðinni er nauðsynlegt að hvíla skrokkinn stundum.   

Frá því ég gaf sjálfum mér reiðhjólið í afmælisgjöf sumarið 2007 hef ég lagt að baki um 28.500 kílómetra á því. Langmest í hjólatúrum hér í sýslunum Ille-et-Vilaine og Cotes-d'Armor á Bretaníuskaga og Manche í Normandí og Mayenne í Pays de la Loire. Ýmist hef ég hjólað með félögunum í hjólafélaginu hér í Combourg í skipulögðum klúbbtúrum miðvikudaga og sunnudag. Einnig hef ég reynt að hjóla einn til tvo aðra daga í viku hverri og þá yfirleitt verið einsamall.

Inni í þessu í ár eru svo nokkur hjólaröll. Hið lengsta í byrjun júní, 604 kílómetrar frá Rennes til Brest á vesturenda Frakklands og til baka. Það var mjög skemmtileg áskorun en þátttakendur voru 300. Ekki er beint um keppni að ræða, en ljúka verður þó dæminu innan vissra tímamarka. Það reyndist mér létt enda með góðan undirbúning að baki.

Þetta rall var góður undirbúningur fyrir rallið frá París til Brest og til baka til Parísar, sem næst fer fram 2011. Þar verða menn að leggja að baki rúmlega 1200 kílómetra á innan við 80-90 klukkustundum, að meðtöldum hvíldum. RBR-rallið fór að mestu fram á sömu leiðum og vestari helmingur París-Brest-París liggur um.

PBP-rallið fór síðast fram 2007 og voru þátttakendur á sjötta þúsund. Margir heltust úr lestinni á bakaleiðinni frá Brest enda rigning alla dagana fjóra sem það stóð yfir. Verra getur það líklega ekki verið! Þetta rall hefur farið farm fjórða hvert ár í um hundrað ár! Og síðast voru útlendir þátttakendur fleiri en franskir, úr öllum heimshornum.

Enginn fær þó að vera með nema hafa tekið þátt í viðurkenndum úrtökuröllum sem fara fram út um allar jarðir, t.d. á Norðurlöndunum en nefna má, að Danir eru mjög duglegir að mæta til þátttöku í Parísar-Brest-Parísar hjóladæminu. Venjan hefur verið að þessi röll fara fram sama ár en í fyrsta sinn hér í landi verður hægt að öðlast þátttökurétt ári fyrr með því að ljúka sérstökum úrtökuröllum, 200 km, 300 km, 400 km og 600 km, en einnig verða í boði 1000 km röll. Með röllunum í ár hef ég klárað það sem til þarf og horfi því bjartsýnn til rallanna á næsta ári og ætla mér að kvalifisera þá fyrir P-B-P rallið 2011. Það verður ágætt að geta undirbúið sig í ró og næði síðasta árið og tékkað sig af í nokkrum langröllum um vorið og sumarið, en rallið mikla fer fram seint í ágústmánuði. 

Svona álag á reiðhjól, 28 þúsund kílómetrar á rúmlega tveimur árum, bitnar á aflrásinni. Góð keðja endist ekki nema um 10.000 km og tannhjól eitthvað álíka. Og dekkin slitna og þarfnast líka endurnýjunar. Er nú komið að því að endurnýja tannhjólakassettuna á afturfelgunni eina ferðina enn og minna pedalatannhjólið. Um það sér hjólafélagi og sérlegur tæknimaður klúbbsins, gamall fagmaður sem rekur hjólabúð og viðgerðarverkstæði í nágrannabæ.    

(Um muninn á frístundahjólurum og atvinnumönnum má nefna að þeir síðarnefndu skipta um keðju á 2.000 til 3000 km fresti og eru þó með miklu vandaðri og dýrari íhluti en aðrir! Og hjól þeirra kosta á annan tug þúsunda evra, til samanburðar kostaði mitt 640 evrur og telst sæmilegt byrjandahjól. Milli atvinnumanna og frístundahjólamanna eins og mín eru tvö stig keppnismanna, áhugamanna annars vegar sem æfa og keppa af hörku og hins vegar svonefndir ástríðuhjólamenn sem eru eiginlegar frístundahjólamenn sem taka reglulega þátt í keppnum ýmiss konar)

Eins og nærri má geta, eru hjólreiðar á öllum stigum mjög vinsælar í Frakklandi. Byggja þær á langri hefð. Segja má, að ég hafi sogast inn í heim hjólreiðanna eftir að ég flutti hingað út. Útiveran sem þessu fylgir er góð, maður kynnist nánasta umhverfi vel, er oftast í skemmtilegum félagsskap. Og heilsubótin sem þessu fylgir er fín.   

    

Gott hjá Óla

Það þarf auðmýkt og góðan skammt af hugrekki í svona leiðangur. Ég vona bara að Óla gagni vel, hann hefur allt til að bera sem þarf, traustur og klár maður þar á ferð.

Ólafur í forsetaframboð

Tvær franskar skútur þveruðu Atlantshafið á rúmum þremur dögum

Það er ekki aðeins að franski skútustjórinn Pascal Bidegorry og áhöfn hans hafi siglt lengri vegalengd á sólarhring en nokkru sinni hefur áður verið gert á skútu. Áhöfnin vann það afrek einnig, að vera fljótari á leiðinni frá Ambrose-vita við New York til Lizard Point í Bretlandi en áður þekkist, eða rúma þrjá daga!

Bidegorry og 11 manna áhöfn hans á fjölbytnunni risastóru, Banque Populaire V, var þrjá daga, 15 klukkustundir, 25 mínútur og 48 sekúndur frá New York til Bretlands.

Gamla metið var í eigu annars Frakka, Franck Cammas, og var 4 dagar, 3 stundir, 57 mínútur og 54 sekúndur, frá í júlí árið 2007.

Cammas freistaði þess einnig að bæta metið og því var í raun og veru um nokkurs konar kappsiglingu að ræða milli frönsku skútustjóranna tveggja að ræða. Methafinn gamli þveraði Atlantshafið einnig á innan við fjórum sólarhringum og bætti sitt gamla met. Var tæpum þremur klukkutímum á eftir Bidegorry; sigldi á 3 dögum, 18 stundum, 12 mínútum og 56 sekúndum.  

Bætti Bidegorry gamla siglingametið um rúmar 12 stundir og Cammas var 9 stundum og 44 mínútum fljótari en í metsiglingunni 2007.

Um er að ræða 2.925 sjómílna vegalengd, eða 5.405 km. Meðalhraði skútunnar var 32,94 hnútar eða næstum því 61 km/klst. Meðalhraði Cammas á siglingunni fyrir tveimur árum var 28,65 hnútar.

Eins og ég hafði áður bloggað gerðist það á siglingunni, að skútan Banque Populaire V undir stjórn Bidegorry lagði að baki lengri vegalengd á sólarhring en nokkur önnur skúta hefur gert í sögunni, eða 880 sjómílur. Meðalhraðinn því 36,66 hnútar á klst.  Það jafngildir 1.626 kílómetrum, sem er ekki fjarri vegalengdinni frá London til Reykjavíkur í beinni línu! Gamla metið átti Cammas.

Skúturnar tvær eru engin smásmíði.  Groupama 3 er 103 feta löng, eða 31 metri. Banque Populaire V er nokkuð lengri, 131 fet, eða 39,9 metrar. 

Cammas hóf siglinguna 2:35 stundum á undan Bidegorry og því munaði ekki mörgum mínútum er þær sigldu yfir marklínuna undan Lizard Point á suðurodda Cornwall-skaga í Englandi.

 

Franskur skútustjóri sigldi 1.626 km á sólarhring

Frakkar eru miklir siglingamenn og krökkt er yfirleitt af skútum við strendur landsins frá í mars og fram í október.

Svo hefur verið um áratuga skeið, ef ekki lengur. Oft á ári setja þeir einhver met. Í dag sigldu t.d. Pascal Bidegorry og áhöfn hans lengri vegalengd á sólarhring en nokkru sinni hefur áður verið gert á skútu.

Bidegorry of félagar lögðu að baki 880 sjómílur á 24 stundum og meðalhraðinn því 36,66 hnútar á klst.  Það jafngildir 1.626 kílómetrum, sem er ekki fjarri vegalengdinni frá London til Reykjavíkur í beinni línu! Gamla metið átti annar franskur skútustjóri, Franck Cammas.

 

Bayern vildi a.m.k. 100 milljónir evra fyrir Ribery

Ekkert skrítið að Bayern München hélst á Franck Ribery, franska framherjanum sókndjarfa. Liðið setti það háan verðmiða á hann að lið sem sýndu honum áhuga misstu móðinn. Uli Höness staðfesti í dag, að Bayern hefði krafist a.m.k. 100 milljóna evra fyrir Ribery af Real Madrid er spænska stórliðið lagði sig í líma í sumar að krækja í hann.

Höness segir Bayern hafa viljað „þriggja stafa tölu upphæð“ fyrir Ribery og er liðið sat fast við þann keip hafi Real Madrid gefist upp. Enda búið að reiða fram vel á annað hundrað milljónir evra fyrir Kaka og Ronaldo.

Að sögn franska íþróttadagblaðsins var Real Madrid reiðubúið að borga 80 milljónir evra fyrir Ribery. Hann gekk til liðs við Bayern 2007 og er samningsbundinn út árið 2011. Hann hefur sjálfur látið svo um mælt að frá Bayern færi hann ekki til neins annars liðs en hins spænska.